ბათუმი პირველად მასპინძლობს რომის იმპერიის ისტორიისა და არქეოლოგიისადმი მიძღვნილ საერთაშორისო კონგრესს
ბათუმი პირველად მასპინძლობს რომის იმპერიის ისტორიისა და არქეოლოგიისადმი მიძღვნილ საერთაშორისო კონგრესს - „ლიმეს კონგრესი 2024“.
ბათუმი, როგორც კონგრესის მასპინძელი მხარე, ოფიციალურად ნიდერლანდების ქალაქ ნეიმეგენში დასახელდა.
კონგრესის მთავარი თემაა რომის იმპერიის სასაზღვრო ხაზების ისტორია და სხვადასხვა თემატიკა ეკონომიკური ურთიერთობების, ვაჭრობის, კულტურის, პოლიტიკური და სოციალური საკითხების, ახალი არქეოლოგიური გათხრების მიმართულებით.
ფორუმი დღეს გაიხსნა და 14 სექტემბრის ჩათვლით გაგრძელდება. გარდა სესიებისა, დაგეგმილია სხვადასხვა ექსკურსია რეგიონის ღირსშესანიშნავი ადგილების დათვალიერების მიზნით.
ფორუმში მსოფლიოს 42 ქვეყნის 350-ამდე დელეგატი მონაწილეობს.
არჩილ ჩიქოვანი: მოხარული ვარ, რომ ჩვენი ქალაქი ისეთ მნიშვნელოვან ღონისძიებას მასპინძლობს, როგორიც ლიმეს კონგრესია.
მოგეხსენებათ, ბათუმმა მრავალგზის მოიპოვა ტურიზმის ოსკარი. გასულ წელს ჯილდო გადმოგვეცა როგორც მსოფლიოს ოთხი სეზონის ტურისტულ მიმართულებას. ჩვენი ქალაქი ასევე არაერთი მასშტაბური საერთაშორისო თუ რეგიონული ფორუმის მასპინძელია და ნიშანდობლივია, რომ ლიმეს 26-ე კონგრესი წელს სწორედ აქ იმართება.
დღევანდელ კონგრესზე და მომდევნო დღეებში, ფორუმის ფარგლებში გაიმართება სხვადასხვა სემინარი რომაულ ისტორიასა და არქეოლოგიასთან დაკავშირებით, ასევე - კულტურული ღონისძიებები. დელეგატები მოინახულებენ ქალაქისა და აჭარის რეგიონის ღირსშესანიშნაობებს, მათ შორის, რა თქმა უნდა, რომაული საფორტიფიკაციო ნაგებობის მნიშვნელოვან ძეგლს - გონიოს ციხეს, სადაც 12 სექტემბერს იმართება რომაული ფესტივალი.
ფორუმის დღეები ძალიან მრავალფეროვანია და დარწმუნებული ვარ, მონაწილეებისთვის საინტერესო და ნაყოფიერი იქნება. ღონისძიება ასევე ხელს შეუწყობს წარმოდგენილი ქვეყნების სამეცნიერო ინსტიტუციებს შორის ურთიერთობების გაღრმავებას, ცოდნისა და გამოცდილების გაზიარებას.
მადლობა მინდა გადავუხადო ლიმეს კონგრესის აღმასრულებელ კომიტეტს, ვარშავის უნივერსიტეტს, აჭარის მთავრობას, განათლების სამინისტროს, აჭარის კულტურული მემკვიდრეობის დაცვის სააგენტოსა და ყველა ჩართულ პირს, რომელთა მხარდაჭერითა და აქტიურობით შეირჩა ბათუმი კონგრესის ჩასატარებლად.
კონგრესი 1949 წლიდან ყოველ 3 წელიწადში ერთხელ ტარდება ყოფილი რომის იმპერიის გავრცელების არეალში.
„ლიმეს კონგრესი 2024“ აჭარის კულტურული მემკვიდრეობის დაცვის სააგენტოსა და ვარშავის უნივერსიტეტს შორის გაფორმებული მემორანდუმის ფარგლებში ხორციელდება.
