ბათუმში ახალგაზრდული ფორუმი გაიმართა
ბათუმში ახალგაზრდული ფორუმი გაიმართა, რომელშიც აჭარის ექვსივე მუნიციპალიტეტის 200-ამდე ახალგაზრდა მონაწილეობდა.
ფორუმის მიზანია ახალგაზრდებში მოტივაციის ამაღლება, გამოცდილების გაზიარება, ჩართულობის გაზრდა, ასევე მუნიციპალურ დონეზე ახალგაზრდების მონაწილეობითი პოლიტიკის წახალისება.
არჩილ ჩიქოვანი: პირველ რიგში, მადლობა მინდა გადავუხადო ახალგაზრდობის რეგიონულ ცენტრს იმისათვის, რომ ათიათასობით ახალგაზრდას მიეცა შესაძლებლობა ესარგებლა სხვადასხვა ბენეფიტით. ბუნებრივია, ჩვენც, ადგილობრივი ხელისუფლება, მაქსიმალურად ვუჭერთ მხარს ახალ წამოწყებებს. თქვენი ჩართულობა, თქვენი ხმამაღალი სიტყვა და კონკრეტული გადაწყვეტილებები ძალიან მნიშვნელოვანია. საამაყოა ისიც, რომ ამ მიმართულებით ჩვენი რეგიონი ერთ-ერთ ჰაბად აღიქმება.
მალე, რამდენიმე დღეში, გავხსნით ახალ სივრცეს, სადაც ნებისმიერ თქვენგანს ექნება შესაძლებლობა, განახორციელოს სტარტაპ იდეები და დარწმუნებული ვარ, რომ ჩვენი ქალაქი, ჩვენი რეგიონი იქნება მოწინავე ამ მიმართულებით. რა თქმა უნდა, ამ პროცესის მონაწილე იქნება ახალგაზრდობის რეგიონული ცენტრიც, რაც მნიშვნელოვანია მეტი ახალგაზრდის ჩართულობის კუთხით.
ჩვენ, მუნიციპალურ დონეზე, გვაქვს ახალგაზრდული ინიციატივების პროგრამა, რომლის ბენეფიციარებიც შეიძლება უკვე ხართ ან სამომავლოდ გახდეთ. მზად ვართ თქვენთან თანამშრომლობისათვის უწყვეტ რეჟიმში. კიდევ ერთხელ მინდა წარმატებები გისურვოთ ყველა ახალგაზრდას.
